Granatimet ruse i kanë vënë flakën tregut qendror në qytetin lindor të Ukrainës, Slovyansk, duke lënë të vrarë një person dhe duke plagosur shtatë të tjerë, ka thënë kryebashkiaku.
Vadym Lyakh, ka thënë se qyteti po goditet nga sulmet e artilerisë ruse nga pozicione më të afërta, përderisa Rusia po kërkon të kontrollojë të gjithë zonën industriale lindore të Donbasit.
Kjo zonë përfshin rajonet e Luhansk dhe Donetsk dhe Presidenti Vladimir Putin pretendon se është pjesë e Rusisë.
Ndërsa të hënën e 4 korrikut, ushtria e Ukrainës ka thënë se duhej të tërhiqej nga Lysychansk, i cili është edhe bastioni i fundit i saj i mbetur në Luhansk, nën zjarrin intensiv rus.
Ajo ka thënë se trupat e saj tani po forcojnë fortifikimet për të mbrojtur zonat që ajo mban në Donetsk, duke përfshirë edhe Slovyanskin, raporton BBC.