Ndonëse procesi i regjistrimit të popullsisë ka përfunduar rreth tri javë më parë, Agjencia Statistikave ua ka vonuar pagesat regjistruesve dhe mbikëqyrësve që kanë punuar në këtë projekt.
Kështu të paktën disa nga regjistruesit dhe mbikëqyrësit nga disa regjione te Kosovës janë ankuar te Dukagjini.
Për këtë, Dukagjini ka kontaktuar me shefin e ASK-së, Avni Kastratin, cili ka njoftuar se pagesat do të procedohen javën e ardhshme.
“Agjencia e Statistikave të Kosovës (ASK) njofton mbikëqyrësit dhe regjistruesit se pagesat për periudhën e angazhimit të tyre për punën në terren do të fillojnë javën e ardhshme. Bazuar në procedurat e zakonshme dhe angazhimin maksimal të stafit të ASK-së për pagesat e shumta dhe të ndryshme për Mbikëqyrës e Regjistrues, pagesat do të fillojnë të bëhen nga data 17 qershor 2024, dhe para fundit të muajit qershor do të procedohen për pagesë për të gjithë të angazhuarit.”
Kujtojmë se procesi i regjistrimit kishte filluar më 5 prill dhe ka mbaruar më 24 maj, e që, sipas ASK-së, Kosova pritet t’i ketë 1.6 milion banorë.