Pas raportimit se 330 euro do të jetë shuma me të cilën do të kompenzohet në formë të mëditjes kryeministri i Kosovës, Albin Kurti, për qëndrimin e tij në Shtetet e Bashkuara të Amerikës për 16 ditë radhazi, ka reaguar zëdhënësi i qeverisë, Përparim Kryeziu.
Ai, me anë të një postimi në llogarinë e tij në Facebook, ka deklaruar se kryeministri Kurti nuk merr mëditje.
“Sipas ligjit edhe mund t’i takojnë, por ai me vullnet dhe dëshirë nuk pranon mëditje për udhëtimet jashtë vendit”, ka shkruar Kryeziu.
Sipas tij, Kurti, prej së është zgjedhur i pari i ekzekutivit asnjëherë nuk ka marrë mëditje.
“Nuk ka marrë mëditje në asnjë udhëtim, që prej kur është zgjedhur për herë të parë Kryeministër, ashtu po vepron edhe tani”, shtoi Kryeziu.
Kryeministri Kurti ka qëndruar për 16 ditë në SHBA, i shoqëruar nga Luan Dalipi dhe Liza Gashi.
Që nga gjashtë maji ndodhet në SHBA, mirëpo produktiviteti i vizitës së kryeministrit Albin Kurti është vlerësuar i zbehtë.
16-ditëshi i kreut qeveritar në SHBA, nga opozita shihet si vizitë studimore dhe pa takime me zyrtarë të lartë amerikanë, ndërsa në shoqërinë civile kërkojnë rezultate konkrete nga ky qëndrim maratonik në shtetin aleat të Kosovës.
Gjatë qëndrimit në Amerikë, Kurti pati takime më përfaqësues të kompanive teknologjike e me drejtoreshën e Korporatës së Sfidave të Mijëvjeçarit.
Që nga marrja e mandatit si kryeministër, kjo është vizita e parë zyrtare e Kurtit në SHBA.