Në një fjalim, të martën e 16 gushtit kandidati për president në Kenia, Raila Odinga ka folur për herë të parë për humbjen e zgjedhjeve duke thënë se koalicioni i tij “refuzon plotësisht dhe pa rezerva rezultatet presidenciale”.
“Sipas pikëpamjes sonë, nuk ka asnjë fitues të shpallur ligjërisht dhe në mënyrë të vlefshme dhe asnjë president të zgjedhur,” tha ish-kryeministri kenian për rezultatet e shpallura nga kryetari i komisionit zgjedhor, të hënën e 15 gushtit.
Komisioni i Pavarur Zgjedhor dhe i Kufijve ka shpallur fitues të zgjedhjeve presidenciale William Ruto me 50.49% të votave dhe Odinga të dytin me 48.85%.
Nënkryetarja e Komisionit të Pavarur Zgjedhor dhe Kufijve, Juliana Cherera u shpreh se përmbledhja e përqindjeve të votave që ka marrë secili kandidat ishte e një “absurditeti matematikor”, duke theksuar se numri i votave ishte 100.1%, një mospërputhje prej 0.01%.
Odinga i konsideroi shifrat e paraqitura nga kryetari, Wafula Chebukati si të pavlefshme, duke thënë se ai do të “ndiqte të gjitha opsionet kushtetuese dhe ligjore që kemi në dispozicion.” Kjo është përpjekja e pestë e Odingës në presidencë dhe ai ka thënë se do të garojë për herë të fundit, raporton CNN.
Mbyllet procesi zgjedhor në Kenia, në pritje të presidentit të ri