Dogana e Kosovës gjatë vitit 2022 ka mbledhur 1 miliard e 531 milionë euro. Viti i kaluar, sipas drejtorit të Përgjithshëm të Doganës, Agron Llugaliu, ishte më i suksesshëm sesa viti 2021.
Në konferencë për medie të mbajtur të premten, Llugaliu ka deklaruar se të hyrat e vitit 2022 janë 154 milionë euro më shumë se në vitin paraprak. Megjithatë, ai tha se rritja e të hyrave është edhe si rezultat i inflacionit, rritjes së çmimeve të produkteve.
Ai shtoi se në vitin 2022 janë importuar mallra në vlerë të 5.6 miliardë eurove, ndërsa janë eksportuar vetëm 869 milionë euro. Krahas kësaj, Llugaliu tha se importi nga Serbia vitin e kaluar ka qenë 370 milionë euro. Kurse, Kosova ka importuar më shumti nga Turqia. KP