Në kuadër të samitit inaugurues të Komunitetit Politik Evropian, presidentja Osmani është takuar me kryeminsitrin e Belgjikës, Alexander De Croo. Në këtë takim është diskutuar për marrëdhëniet bilaterale dhe çështjet aktuale ne Evropë.
Osmani dhe De Croo kanë vlerësuar raportet ndërshtetërore dhe janë angazhuar për thellimin e bashkëpunimit mes shteteve.
“Në këtë frymë, Presidentja Osmani ka ritheksuar rëndësinë e përfundimit sa më parë të procesit të liberalizimit të vizave për qytetarët e Kosovës”, thuhet në zyrën e Presidencës.
Në këtë njoftim, tutje thuhet se presidentja Osmani ka falënderuar kryeministrin De Croo për mbështetjen belge për anëtarësimin e Kosovës në Këshillin e Evropës.
Ndërsa, në kontekst të integrimit evropian, presidentja Osmani ka theksuar se Kosova është e përkushtuar që të avancojë këtë proces, duke aplikuar për anëtarësim në Bashkimin Evropian.