Edhe Prokuroria Themelore në Prishtinë, njëjtë si Policia e Kosovës, e ka cilësuar të dyshimtë vdekjen e gruas që ndodhi këtë të mërkurë në lagjen “Bregu i Diellit” në Prishtinë.
Prokuroria Themelore në Prishtinë për Portalin Dukagjini ka bërë të ditur se prokurorja kujdestare nga Departamenti i Krimeve të Rënda ndodhet në vendin e ngjarjes me njësitë e tjera relevante.
“Ju njoftojmë se prokurorja kujdestare nga Departamenti i Krimeve të Rënda ndodhet në vendin e ngjarjes me njësitë e tjera relevante. Është gjetur një trup pa shenja jete (femër). Sipas informatave fillestare nga vendi i ngjarjes, rasti ka të bëjë me vdekje në rrethana të dyshimta”, thuhet në përgjigjen e prokurorisë.
Tutje thuhet se pas ekzaminimeve nga vendi i ngjarjes, trupi i pajetë do të dërgohet në IML për obduksion.
Ndryshe, Policia e Kosovës ka konfirmuar vdekjen e dyshimtë në lagjen “Bregu i Diellit”, në Prishtinë.
Kështu ka bërë të ditur për Portalin Dukagjini, zëdhënësja e policisë për rajonin e Prishtinës, Flora Ahmeti, e cila ka theksuar se viktima është një grua.
“Rreth orës 13:00, kemi pranuar informatën për një person të lënduar, të shtrirë në afërsi të një objekti në rrugën “Ferat Dragaj” në Prishtinë. Policia dhe ekipi mjekësor menjëherë kanë dalë në vendin e ngjarjes, ku nga ekipi mjekësor është konstatuar vdekja e personit (femër)”, ka thënë Ahmeti.
Sipas saj, aktualisht policia po ndërmerr të gjitha veprimet e duhura hetimore dhe ato forenzike – të ekzaminimit, që, siç thotë, ajo do të ndihmonin hetimin e ngjarjes si dhe sqarimin dhe ndriçimin e plotë të rastit.
Në vendin e ngjarjes janë parë njësitet mjekësore dhe ato policore.
Rruga ku është gjetur viktima tashmë është bllokuar.