Kryetari i Partisë Demokratike të Kosovës (PDK), Memli Krasniqi, në seancën e së enjtes në Kuvendin e Kosovës, ku po diskutohet për marrëveshjen e Ohrit, i është drejtuar kryeministrit Albin Kurti me një pyetje “Kryeministër çka ka, çka s’ka, a ka Zajednicë apo Asociacion”.
Krasniqi ka thënë se sot ka degradim esencial të dialogut, dhe sipas tij kryeministri Kurti e ka përmbyllur jetën e tij politike me deklaratën e mbrëmshme se “po ka Asociacion të përfshirë në Planin Evropian”.
Ndër të tjera, Krasniqi ka thënë se Kurti e ka bërë kapërcimin më të madh ndonjëherë në politikë me këtë pajtim, “prej po Vetëvendosje jo negociata, tashmë jo për Kosovën po për serbët e Kosovës”.
“Sot jemi dëshmitarë të degradimit esencial të dialogut. Me një fjali e ke përmbyllur jetën politike, sepse po ka Asociacion, ka pasur Asociacion sa herë që ke thënë që s’ka. Loja me fjalë e ka afatin e skadimit, kryeministri veprimet i ka marrë mbi vete për ironi të fatit të Kosovës në vilën e Josip Titos, kasapit të Kosovës”, ka thënë Krasniqi.
Sipas tij, kjo tradhti e Kurtit mund të mos jetë tradhti kombëtare, por është tradhti ndaj ndjekësve të vet, militantëve të tij.
“Kurti u ka premtuar se nuk do të ketë Zajednicë, ka rrezikuar të japë autonomi serbëve të Kosovës. Ky degradim i këtij procesi është faji i tij, tha edhe vetë e ka riformatuar dialogun, sepse prej qëllimit të njohjes së ndërsjellë e ka pranuar mosnjohjen, është dorëzim”.