Gjykata Themelore në Prishtinë, ka caktuar e masën së paraburgimit në kohëzgjatje prej 30 ditësh ndaj Ilir Avdullahut, i njohur me nofkën “Liza”, i cili ishte arrestuar të dielën, pasi për vite me radhë kërkohej si i dyshuar për vrasjen e Triumf Rizës.
“Gjyqtari i procedurës paraprake ka aprovuar si të bazuar kërkesën e Prokurorisë Speciale të Republikës së Kosvës, për caktimin e masës së paraburgimit kundër të pandehurit I.A dhe të njëjtit iu caktua masa e paraburgimit në kohëzgjatje prej 1 (një) muaji”, thuhet në njoftimin e Gjykatës Themelore në Prishtinë.
“Gjyqtari i procedurës paraprake ka analizuar të gjitha arsyet mbi caktimin e paraburgimit kundër të pandehurit I.A dhe ka vlerësuar se përmbushet kriteri nga neni 184 paragrafi 1 nën paragrafi 1.2 pika 1.2.1. të KPRK-së, si kusht i veçantë për caktimin e paraburgimit, ngase ekzistojnë rrethana të cilat tregojnë rrezikun e ikjes së të pandehurit, pasi që i njëjti dyshohet për vepër të rëndë penale për të cilën sipas ligjit parashihet dënim i lart burgimi, duke shtuar faktin se i pandehuri nga viti 2008 ka qenë në arrati, andaj bazuar në të kaluarën e të pandehurit dhe sjelljen e tij ne raport me organet ligj zbatuese, gjykata konsideron se nëse i njëjti gjendet në liri, ekziston rreziku që të arratiset dhe të bëhet i pakapshëm për organet e drejtësisë, andaj konstatoi së masa e paraburgimit është e vetmja masë për rrjedhjen e pa penguar të procedurës penale në këtë çështje juridiko – penale, në këtë fazë të procedurës penale”.
Kundër këtij aktvendimi, siç thuhet në njoftim, palët e pakënaqura kanë të drejtë ankese në Gjykatën e Apelit, përmes Gjykatës Themelore në Prishtinë.
Ndryshe, Prokuroria Speciale e Republikës së Kosovës (PSRK), të hënën, më 17 korrik, ka bërë kërkesë për caktimin e paraburgimit ndaj të pandehurit me inicialet I.A, i njohur me nofkën “Liza”.
Siç ka njoftuar PSRK-ja, ekziston dyshimi i bazuar se i pandehuri I.A., në bashkëkryerje edhe me të pandehurit A.B, F. A, Rr.A, si grup i organizuar nga i pandehuri E.S, të shtyrë nga motivi i hakmarrjes së paskrupullt, me dashje që të privojnë nga jeta T.R, për shkak se i njëjti, më parë në lokalin “Swiss Casino” në Prishtinë, e kishte rrahur E.S.
Policia e Kosovës më 16 korrik kishte njoftuar se është arrestuar personi i kërkuar me nofkën “Liza”, i cili për disa vite me radhë kërkohej si i dyshuar për vrasje.
I.A u prangos rreth orës 17:00 në Batllavë të Podujevës.
“Si rezultat i angazhimeve dhe hetimeve të pandërprera të Policisë së Kosovës, sot me datën 16.07.2023, rreth orës 17:00, në Batllavë të Podujevës është arrestuar i shumëkërkuari (I, A,) i njohur me nofkën ‘Liza’”.
Sipas policisë, arrestimi i tij është kryer pas bashkëpunimit dhe koordinimit të njësiteve të ndryshme policore, përfshirë sektorin e narkotikëve, të cilët kanë asistuar deri në arrestimin e tij.
Ilir Avdullahu konsiderohet të jetë bashkëpunëtor i Enver Sekiraqës, i dyshuar për përfshirje në vrasjen e policit Triumf Riza.
I dyshuari ka qenë në kërkim nga Interpoli nën akuzat për organizim të vrasjes së policit Riza.
Arben Berisha është dënuar me 35 vite burgim për vrasjen e policit.
Incidenti në “Swiss Casino” kishte ndodhur në dhjetorin e vitit 2006, ndërsa në të ishin të përfshirë Enver Sekiraqa, disa shoqërues të tij në njërën anë dhe i ndjeri Triumf Riza e Arben Selmani në anën tjetër.
Në këtë incident i plagosur rëndë kishte mbetur Arben Selmani.