Kryeministri i Kosovës, Albin Kurti, ka pritur në takim Dora Bakoyannis, raportuesen për Komisionin e Çështjeve Politike të Asamblesë Parlamentare të Këshillit të Evropës (PACE) për aplikimin e Kosovës për anëtarësim në Këshillin e Evropës në misionin e saj faktmbledhës në Kosovë.
Siç thuhet në njoftimin e zyrës së Kryeministrit, Kurti e ka falënderuar për vizitën e saj, duke theksuar që është nder dhe kënaqësi ta mirëpres në Kosovë dhe në kryeministri.
“U shpreh se për Kosovën anëtarësimi në Këshill të Evropës është proces historik i cili i kontribuon mbrojtjes, promovimit dhe avancimit të demokracisë, sundimit të ligjit dhe të drejtave të njeriut, dhe se Republika e Kosovës po angazhohet maksimalisht që çdo fazë e anëtarësimit të shkojë në mënyrën më të mirë të mundshme, ndërkohë që ndau me të më të rejat për sa i takon zhvillimeve politike në vend, performancës ekonomike, progresit demokratik dhe reformave të deritanishme”, thuhet në njoftim.
Ndërkaq, raportuesja Bakoyannis ka falënderuar Kurtin për mikpritjen, duke shprehur e lumtur me ndryshimin dhe zhvillimin që ka shënuar vendi prej vizitës saj të fundit para 14 vjetëve, teksa theksoi se raporti që do të përpilojë ajo nga qëndrimi i saj këtu, do të shërbejë si bazë për vendimmarrje në PACE.