Në njëvjetorin e vdekjes së humoristit Rasim Thaçi – Cima, është përkujtuar nga familjarë, përfaqësues të institucioneve dhe bashkëpunëtorët e tij. Ministri i Kulturës, Hajrulla Çeku, ka thënë se vendi është krenar për kontributin e Cimës, dhe se ka lënë gjurmë të pashlyeshme në kulturën kosovare për të cilën shoqëria është krenare. Ndërsa, bashkëpunëtorët e vlerësuan si emblemë të kulturës kosovare.
E bija e Cimës, artistja Adelina Thaçi – Meta, tha se sa herë e kujtojnë të atin, i rikthehet fuqia dhe optimizmi, buzëqeshja e dashuria edhe për vendin.
Duke kujtuar ditët e vështira të humoristit Cimës, para se të mbyllte sytë përgjithmonë, Adelina shtoi se ai po luante edhe në aktin e fundit të shfaqjes së tij, pasi i kishte bërë që të besonin se po e mundte sëmundjen.
Ai është përkujtuar dhe nga miku i tij i ngushtë, njëherësh bashkëpunëtori i tij prej vitesh, Sevdai Radogoshi-Qumili, i cili ka shpërndarë disa fotografi të përbashkëta me Cimën në rrjetet sociale, duke e quajtur atë si “Mbreti i humorit”, dhe e falënderoi për momentet e bukura që ka dhuruar kinematografisë kosovare.
Kontributin i Cimës e kujtoi edhe bashkëpunëtori, Mustafa Lili, duke thënë se veprat e tij dhe ai do të mbeten emblemë e komunitetit artistik të kulturës shqiptare.
E në njëvjetorin e vdekjes së artistit Rasim Thaçi, makina e tij unike e përdorur nga vet e ai, është vendosur para Ministrisë së Kulturës së bashku me rrobat e tij, të vendosura brenda veturës, e që janë të njohshme për publikun shqiptarë.
Artisti Rasim Thaçi – Cima, vdiq më 26 mars të vitit 2021, ndërkohë që ndodhej në Klinikën Infektive në Prishtinë, pasi që ishte infektuar me virusin Covid-19.