I dërguari i BE-së për dialogun Kosovë-Serbi, Miroslav Lajçak derisa ka uruar festën e Pashkëve, ka folur edhe për takimet e javës së kaluar me kryenegociatorët e Kosovës dhe Serbisë në kuadër të dialogut.
Ai tha se në përgjithsi takimi për dinarin në mes të Besnik Bislimit dhe Petar Petkoviqit ishte i dobishëm, derisa theksoi se palët i kanë dhënë tashmë qëndrimet e tyre.
“Java para pushimit të Pashkëve ka qenë një javë e shkurtër edhe pse intensive. Të hënën prita në Bruksel kryenegociatorët e Kosovës, zëvendëskryeministrin Bislimi dhe të Serbisë, drejtorin Petkovic, për të vazhduar diskutimet tona për gjetjen e një zgjidhjeje të zbatueshme për njerëzit e prekur nga vendimi i Bankës Qendrore të Kosovës. Në përgjithësi, ka qenë një takim i dobishëm. Të dyja palët patën mundësinë të shpjegojnë idetë dhe qëndrimet e tyre.”, ka shkruar Lajçak në Facebook.
Ai u shpreh se në takimin e së enjtes shpreson se do të gjendet një lloj zgjidhjeje për dinarin.
“Në fund konkluduam se do të nevojitet një takim tjetër .Të dy palët do të kthehen në Bruksel këtë javë dhe shpresoj se do të jemi në gjendje të kapërcejmë diferencën e mbetur të enjten”, ka thënë ai.
Nga 1 shtatori, Miroslav Lajçak mund të mos jetë më pjesë e procesit të dialogut Kosovë-Serbi.
I dërguari i posaçëm Bashkimit Evropian, sipas Radio Evropës së Lirë, pritet të bëhet ambasador i BE-së në Zvicër.
Megjithatë ende nuk dihet se kush do ta zëvendësojë Lajçakun.
Diplomati sllovak këtë post e kishte pranuar para katër vitesh, ndërkaq mandati zyrtarisht i përfundon në fund të gushtit.
Sipas këtij raportimi, për postin e përfaqësuesit të posaçëm për dialogun do të vendoset pas rotacionit të një numri të madh të ambasadorëve të BE-së nëpër botë.