Avokati Ivan Niniq, ka dorëzuar kallëzim penal ndaj pjesëtarëve të Ushtrisë Serbe dhe grupit të kryeterorristit Millan Radojçiq, për rastin e plagosjes dhe rrëmbimit të Millan Vukashinoviq që dyshohet se u bë nga xhandarmëria serbe e ndodhi në territorin e Republikës së Kosovës, në Leposaviq.
Niniq ka njoftuar se padia është bërë në emrin e nënës së Vukasinoviqit, pasi që për të nuk dihet asgjë që nga 1 nëntori.
Kallëzimi penal është dorëzuar për kryerjen e veprës penale “vrasje në tentativë”.
“Për shkak se për pesë ditë askush nuk ka dhënë asnjë njoftim zyrtar lidhur me qëllimin me armë ndaj Milan Vukašinoviqit, unë, në emër të nënës së tij, kam dorëzuar kallëzim penal te Prokurori i Lartë Publik në Prokuplje, për veprën penale të vrasjes së rëndë në tentativë, kundër personave të panjohur — pjesëtarë të Ushtrisë së Serbisë, policisë ose grupit të Milan R.”, ka shkruar avokati nga Beogradi në platformën “X”.
Zbog toga što PET dana NIKO ništa nije zvanično saopštio o STRELJANJU Milana Vukašinovića, ja sam u ime njegove majke podneo
KRIVIČNU PRIJAVU
Višem javnom tužiocu u Prokuplju, zvog KD Teško ubistvo u pokušaju, protiv NN lica pripadnika Vojske Srbije, policije ili grupe Milana R
— Ivan Ninić (@INinic) November 5, 2025
Sipas Policisë, incidenti dyshohet të ketë ndodhur brenda territorit të Kosovës, në hapësirën e njohur si “pika zero”, në afërsi të Leposaviqit. Policia ka njoftuar se është në koordinim të ngushtë me KFOR-in, i cili ka konfirmuar se është në dijeni për incidentin dhe se situata në vijën kufitare është e qetë.
Në komunikatën e Policisë u tha se “disa persona të maskuar kishin hyrë në territorin e Republikës së Kosovës, duke e plagosur dhe rrëmbyer viktimën të cilët pastaj e kishin dërguar në territorin e Serbisë, ku sipas dëshmitarëve me një autoambulancë e kanë dërguar në drejtim të qytetit të Nishit”./EO
Si dyshohet se u plagos dhe u rrëmbye Milan Vukashinoviq nga xhandarmëria serbe?