Kreu i shtetit të Serbisë, Aleksandër Vuçiq, ka thënë të mërkurën e 6 korrikut se Serbia nuk do të bashkohet me Bashkimin Evropian (BE) për sanksionet kundër Rusisë.
Përveç kësaj, ai ka thënë se nuk do të pranojë një kërkesë për njohje reciproke mes Serbisë dhe Kosovës, transmeton N1.
Parlamenti Evropian ka miratuar të mërkurën një rezolutë për Serbinë, ku kanë rekomanduar hapjen e kapitujve të rinj të negociatave me Serbinë, pasi ajo të përafrojë politikën e saj të jashtme me BE-në, dhe ka shprehur keqardhjen që Beogradi nuk është përafruar me politikën e sanksioneve të BE-së ndaj Rusisë.
Për herë të parë, rezoluta përmend njohjen reciproke mes Serbisë dhe Kosovës, ku iu bën thirrje të dyja palëve të arrijnë një marrëveshje për normalizimin “bazuar në njohjen reciproke”.
Vuçiq i pyetur se si Serbia do t’i përgjigjet këtyre kërkesave, ai tha “Bukur, mirë dhe sjellshëm – nuk do ta bëjmë…”
“As nuk na shkon mendja, nuk do ta shqyrtojmë”, citohet të ketë thënë Vuçiq.