Ministri në detyrë i Financave, Hekuran Murati, ka reaguar pas vendimit të Panelit Zgjedhor për Ankesa dhe Parashtresa (PZAP), i cili i dha të drejtë LDK-së duke anuluar qendrat alternative të votimit jashtë Kosovës.
Murati e akuzoi LDK-në se po vepron kundër interesave të diasporës.
Ai tha se Ministria e Punëve të Jashtme dhe Diasporës kishte ofruar hapësira shtesë për votim, përveç ambasadave dhe konsullatave, për t’iu afruar sa më shumë diasporës dhe për ta bërë më të lehtë procesin e votimit.
“LDK paraqet ankesë në PZAP për të kundërshtuar këtë lehtësim për diasporën. PZAP e miraton ankesën e LDK-së. Me deklarata LDK-ja e kërkon votën e diasporës, ama me vepra po shihet që po bën çmos që ta pengojë”, shkroi Murati në Facebook.
Vendimi i PZAP-it pranoi ankesën e LDK-së, duke vendosur që përfaqësitë diplomatike dhe hapësirat e tyre të jenë qendrat e vetme të votimit për zgjedhjet e 28 dhjetorit, duke hequr mundësinë e hapësirave alternative për votim jashtë vendit.