Kryetari i LDK-së, Lumir Abdixhiku, ka deklaruar se nuk ka ende ndonjë lëvizje të re pas takimit me kryeministrin Albin Kurti, por ka theksuar se përpjekjet për një zgjidhje do të vazhdojnë në ditët në vijim.
Pas takimit rreth dy orësh, Abdixhiku tha se diskutimet janë fokusuar në parimet dhe modalitetet e procesit për zgjedhjen e presidentit, ndërsa ende nuk janë trajtuar emra konkretë.
“Nuk kemi ndonjë lëvizje të re. Takimet do të vazhdojnë edhe në ditët në vijim. Do të takoj edhe liderë të tjerë politikë dhe përmes takimeve transparente po përpiqemi të gjejmë një zgjidhje konsensuale”, ka deklaruar Abdixhiku.
Ai theksoi se aktualisht fokusi është në dakordimin për parimet e procesit, duke shtuar se mungesa e takimeve do të nënkuptonte afrimin e zgjedhjeve.
“Po përpiqemi për zgjidhje përderisa jemi në takime. Në momentin që nuk ka takime, atëherë kuptojeni se zgjedhjet janë të pashmangshme”, u shpreh ai.
Sipas Abdixhikut, gjatë takimit nuk është arritur ende në fazën e diskutimit për kandidatë konkretë, megjithatë ai bëri të ditur se në proces janë dy emra nga Lëvizja Vetëvendosje.
Ai ritheksoi qëndrimin e LDK-së se jo të gjitha pozitat shtetërore duhet t’i takojnë një partie të vetme, duke lënë të kuptohet se zgjidhja duhet të jetë gjithëpërfshirëse.