Të hënën, në Kuvendin e Kosovës pritet të mblidhen disa komisione parlamentare, ku në fokus janë shqyrtimi i projektligjeve.
Në orën 09:00, mblidhet Komisioni për Çështje të Sigurisë dhe Mbrojtjes, i cili do të shqyrtojë Projektligjin për Shtetësinë dhe atë për Lëndët Plasëse.
Nga ora 10:00, paralelisht do të zhvillojnë mbledhjet, Komisioni për Shëndetësi, ku në rend dite është Projektligji për Sigurimin e Detyrueshëm të Kujdesit Shëndetësor dhe Komisioni për Arsim, Shkencë dhe Teknologji, që do të shqyrtojë Projektligjin për Provimin e Maturës Shtetërore.
Në orën 11:00, mblidhet Komisioni për Buxhet, ku ndër pikat kryesore janë votimi i raportit të Avokatit të Popullit për vitin 2025 dhe shqyrtimi i disa projektligjeve financiare.
Nga ora 13:00, mbledhje do të mbajnë, Komisioni për Mjedis, Ushqim, Bujqësi, Pylltari, Zhvillim Rural, Infrastrukturë dhe Transport, me fokus në projektligjet për menaxhimin e resurseve ujore dhe banimin social dhe Komisioni për Kulturë, Turizëm dhe Sport, që do të shqyrtojë Projektligjin për Lojërat Mesdhetare Prishtina 2030.
Ndërkaq, në orën 14:00, mblidhet Komisioni për Ekonomi, Industri, Ndërmarrësi, Tregti dhe Inovacion, i cili do të shqyrtojë masat e përkohshme për produktet themelore në rast destabilizimi të tregut.