Me 58 vota për, 15 kundër dhe 1 abstenim, Kuvendi i Kosovës ka miratuar në lexim të parë projektligjin për energjinë.
Ministrja e Ekonomisë, Artane Rizvanolli, gjatë prezantimit të projektligjit u ka bërë thirrje deputetëve që ta votojnë atë, duke theksuar rëndësinë e reformave në sektorin energjetik.
Ndërkohë, deputeti i Partia Demokratike e Kosovës, Ferat Shala, ka kritikuar procedurën e ndjekur për këtë projektligj, duke e cilësuar si problematike mënyrën e trajtimit dhe mungesën e debatit të gjerë publik.
Sipas Shalës, ligji bart përgjegjësi dhe llogaridhënie nga Kuvendi te ministritë, gjë që ai e vlerëson si shmangie institucionale, veçanërisht në një sektor delikat si energjia dhe mjedisi.
Ai shtoi se, megjithëse kupton nevojën për reforma, ato nuk duhet të bëhen përmes procedurave të përshpejtuara pa konsultime me publikun, ekspertët, shoqërinë civile dhe mediat, duke paralajmëruar se kjo mund të cenojë bazat e legjislacionit.