Kancelari gjerman Friedrich Merz, i përfshirë tashmë në një ‘përplasje’ me presidentin amerikan, Donald Trump lidhur me luftën në Iran, ka deklaruar se nuk do t’i këshillonte fëmijët e tij të studionin apo të punonin në SHBA në klimën aktuale.
Duke folur në një konferencë të të rinjve katolikë në Würzburg, lideri konservator tha se nuk e sheh më Amerikën si “tokën e mundësive”, shkruan The Guardian, transmeton Dukagjini.
“Jam një admirues i madh i Amerikës. Për momentin, admirimi im nuk po rritet”, u shpreh ai, duke përmendur ndryshimet e shpejta në “klimën sociale” të një vendi thellësisht të polarizuar.
“Nuk do t’i këshilloja fëmijët e mi sot të shkonin në SHBA për t’u arsimuar apo për të punuar, sepse atje është krijuar papritur një klimë e caktuar sociale”, tha Merz.
Merz shtoi se edhe njerëzit më të arsimuar në SHBA po e kanë të vështirë të gjejnë punë.
“Besoj fuqishëm se ka pak vende në botë që ofrojnë mundësi kaq të mëdha për të rinjtë sa Gjermania”, deklaroi ai.
Marrëdhëniet mes SHBA-së dhe aleatëve evropianë janë tensionuar për shkak të mosmarrëveshjeve mbi tregtinë dhe ndihmën ushtarake për Ukrainën. Merz ka deklaruar gjithashtu se konfliktet në Lindjen e Mesme dhe mbyllja e ngushticës së Hormuzit kanë dëmtuar rëndë interesat evropiane.