Presidenti i Serbisë, Aleksandar Vuçiq, ka bërë të ditur se do t’i drejtohet me letër sekretarit të përgjithshëm të NATO-s, Mark Rutte, për t’i kërkuar që të mos lejohet hapja e urës kryesore mbi lumin Ibër në Mitrovicë.
Vuçiqi ka pretenduar se procesi po zhvillohet pa njoftuar kryetarin e Mitrovicës së Veriut, Milan Radojeviq.
“Këtë po e bën ai turku, komandanti i KFOR-it. Do t’i shkruaj Mark Ruttes sot. Shpresoj se do të më përgjigjet dhe do ta pranojë kërkesën time që të mos e bëjë këtë. Do t’i shkruaj sot apo nesër”, ka thënë Vuçiqi të martën, sipas raportimeve të mediave në gjuhën serbe.
Ai e ka cilësuar situatën si “marri e madhe dhe zhgënjim”, duke pretenduar se veprimet lidhen me përpjekjet për ta detyruar Serbinë të pranojë pavarësinë e Kosovës.
Ndërkohë, më 10 gusht, KFOR-i njoftoi se ka nisur tranzicionin gradual të pranisë së përhershme në urën e Ibrit në Mitrovicë.
Sipas KFOR-it, ky tranzicion po bëhet në kuadër të përmirësimit të situatës së sigurisë në Kosovë dhe procesit të zvogëlimit gradual të pranisë së misionit.
Për këtë vendim është njoftuar edhe Bashkimi Evropian, i cili ka bërë thirrje që Policia e Kosovës të ofrojë garanci për të gjithë qytetarët.