Presidenti i Ukrainës, Volodymyr Zelensky, ka konfirmuar se Ukraina e mbështet armëpushimin energjetik të njoftuar nga presidenti amerikan, Donald Trump, duke theksuar se pret që edhe Rusia ta mbështesë atë.
“Ukraina e mbështet armëpushimin dhe është e rëndësishme që edhe Rusia ta mbështesë atë”, shkroi Zelensky në një postim në platformën X.
Ai tha se Ukraina është në pritje të hollësive nga pala amerikane.
“Nga ana jonë, Ukraina i mbështet gjithmonë plotësisht hapat drejt uljes së tensioneve, mbrojtjes së jetëve dhe vendimeve të nevojshme për t’i dhënë fund luftës dhe për të garantuar paqe të qëndrueshme”, shkroi ai.
Konfirmimi i Zelenskyt vjen pasi, pak më herët, ai i kishte thënë mediumit amerikan Axios se njoftimi për marrëveshjen ishte “lajm për mua”.
Në postimin e tij, presidenti ukrainas bëri të ditur gjithashtu se kishte biseduar për armëpushimin e pjesshëm me kryeministrin e Kanadasë, Mark Carney, presidentin e Finlandës, Alexander Stubb, dhe sekretarin e përgjithshëm të NATO-s, Mark Rutte.