Dega e Al Qaeda në Mali ka marrë përgjegjësinë të shtunën e 23 korrikut për një sulm në bazën kryesore ushtarake të vendit, për të cilin ka thënë se ishte një përgjigje ndaj bashkëpunimit qeveritar me mercenarët rusë.
Bastisja e së premtes së 22 korrikut në bazën Kati, 15 km jashtë kryeqytetit Bamako ka vrarë të paktën një ushtar. Ky sulm është kryer duke përdorur dy makina bomba, gjithashtu ka plagosur gjashtë persona, ndërsa shtatë sulmues janë vrarë dhe tetë të tjerë janë arrestuar, ka thënë ushtria e Malit.
Njësia e medias për degën lokale të Al Qaeda-s, Jama’at Nusrat al-Islam wal Muslimeen ka thënë në një deklaratë se dega e saj Katiba Macina kishte kryer sulmin, sipas një përkthimi nga Grupi i Inteligjencës SITE, i cili monitoron deklaratat xhihadiste.
Ushtria maliane kishte fajësuar Katiba Macina për sulmin në një deklaratë të premten e 22 korrikut.
Deklarata e JNIM ka thënë se një luftëtar nga Mali kishte shpërthyer një makinë bombë në portën e bazës dhe një luftëtar nga Burkina Faso ka shpërthyer një tjetër brenda bazës, duke lejuar luftëtarë shtesë të hynin në kamp, transmeton reuters.
Ai e ka justifikuar sulmin duke përmendur praninë në Mali të mercenarëve nga Grupi Wagner i Rusisë, i cili filloi të furnizonte qindra luftëtarë vitin e kaluar për të mbështetur ushtrinë e Malit dhe që atëherë është akuzuar nga grupet e të drejtave të njeriut dhe banorët lokalë për pjesëmarrje në masakrat e civilëve.
“Ne i themi qeverisë Bamako: nëse keni të drejtë të punësoni mercenarë për të vrarë njerëzit e pafajshëm të pambrojtur, atëherë ne kemi të drejtë t’ju shkatërrojmë dhe t’ju vëmë në shënjestër”, thuhej në deklaratë.
Ndërsa, qeveria ruse ka pranuar se personeli i Wagner ndodhet në Mali, por qeveria e Malit i ka përshkruar ata si instruktorë nga ushtria ruse dhe jo si kontraktorë privatë të sigurisë. Wagner nuk ka përfaqësim publik dhe nuk ka komentuar akuzat për shkelje të të drejtave të njeriut.