Një burrë i shpëtuar nga rrënojat e një tuneli të shembur në Romë është akuzuar për gërmimin e tij si pjesë e një skenari për të grabitur një bankë.
Të premtën e 12 gushtit policia lokale ka thënë se dyshonte që burri ishte pjesë e një bande prej katër vetash që dyshohet se kishin planifikuar të kryenin grabitjen këtë fundjavë, kur kryeqyteti italian do të ishte relativisht i qetë për shkak të festës publike Ferragosto.
Zyra e shtypit e policisë së Karabinierëve për CNN tha se oficerët mbërritën në tunelin e shembur të enjten e 11 gushtit, pasi morën njoftime se një burrë ishte bllokuar nën rrënoja. Menjëherë pasi mbërritën, ata arrestuan dy persona të dyshuar, të cilët po përpiqeshin të largoheshin nga zona me makinë.
Ekipet e shpëtimit shpenzuan tetë orë për të çliruar burrin e bllokuar, i cili mbetet nën vëzhgimin mjekësor në spitalin San Camillo në Romë.
Avokatja Carmine Pascarosa, e cila përfaqëson dy burrat e arrestuar në makinë, tha për CNN se dyshja ishin akuzuar për rezistencë ndaj arrestimit dhe nuk ishin aktualisht nën hetim për krime të tjera, raporton CNN.
Pasi e kuptuan se çfarë kishte ndodhur, ata thirrën shpëtimtarët përpara se të largoheshin nga vendi i ngjarjes, shtoi ai. Pascarosa konfirmoi se një person i katërt është duke u hetuar dhe është akuzuar së bashku me të plagosurin në lidhje me shembjen e tunelit.