Inspektorati Policor i Kosovës (IPK), ka njoftuar se në koordinim me Prokurorinë Speciale, ka filluar në orët e hershme të mëngjesit aksionin “Pika 2”.
Sipas, IPK-së, këtij operacioni i ka paraprirë një hetimi një vjeçar, ku sipas tyre janë mbledhur prova për aktivitete të dyshimta të zyrtarëve policor, të dyshuar për “marrje e ryshfetit” dhe “keqpërdorim i pozitës apo autoritetit zyrtar”.
“Hetimi përfshin edhe bashkëpunim me prokurorë nga SPAK-u (Struktura e Posaçme kundër korrupsionit dhe krimit të organizuar e Republikës së Shqipërisë) dhe zyrtarët e AMP-së Agjencisë për Mbikëqyrje Policore (agjencia homologe e IPK-së në Shqipëri)”, thuhet në njoftimin e IPK-së.
Ekipi i RTV Dukagjinit gjendjet në vendin e ngjarjes në pikën kufitare në Vërmicë, ku edhe do të sjellin lajmet dhe pamjet më të reja nga ky aksion.
Ky është aksioni i dytë që po zhvillohet për korrupsion të zyrtarëve policorë. Herën e parë ishin arrestuar 50 zyrtarë nën dyshimet e njëjta, për marrje të ryshfetit apo keqpërdorim të pozitës zyrtare.
Herën e kaluar arrestimet kishin ndodhur në pikat kufitare Qafë Morinë dhe Qafë Prush.