Qeveria e Spanjës ka njoftuar rreth planeve për të ulur TVSH-në e gazit këtë vjeshtë.
Qëllimi i këtyre planeve është të ndihmojë njerëzit që të përballen me inflacionin në rritje.
Kryeministri i Spanjës Pedro Sánchez të enjten e 1 shtatorit ka thënë se taksa për gazin natyror fillimisht do të ulet nga 21% në 5% nga tetori deri në fund të vitit.
“Ndërsa hyjmë në vjeshtë dhe dimër, duket e arsyeshme të përpiqemi të ulim faturat e ngrohjes”, dhe se masa mund të zgjatet në vitin 2023 “nëse zgjat situata e vështirë që po kalojmë”, ka thënë Sánchez.
Qeveria spanjolle është duke u përballur me një normë inflacioni vjetor prej më shumë se 10%, e cila është nxitur nga çmimet e energjisë në mes të luftës në Ukrainë, raporton euronews.
Ndërkaq, ministrja spanjolle e ekonomisë Nadia Calviño ka mirëpritur ngadalësimin e normës së inflacionit, por ka përsëritur paralajmërime sepse “ka shumë pasiguri për shkak të luftës” në Ukrainë.
Ndryshe, norma e inflacionit nga viti në vit në Spanjë ka qenë mbi 10% që nga qershori i këtij viti duke u rritur për herë të parë që nga vitet 1980.