Ndonëse roli i tij si Ministër i Shëndetësisë vihej në pikëpyetje, pas krijimit të Komisionit Ekzekutiv për shëndetësi, të kryesuar nga Kryeministri, Albin Kurti, në kuadër të Qeverisë së Kosovës, Latifi ka thënë se kjo nuk e zbeh aspak rolin e tij, përkundrazi e fuqizon.
Gjersa ka qeshur në një pyetje të tillë, ai ka thënë se shëndetësia e një vendi nuk i takon vetëm ministrit të Shëndetësisë, por e gjithë Qeverisë.
“Absolutisht jo. Shumë shtete nëpër botë kanë Health Comition, komision të shëndetësisë. Në realitet kur ka kriza të ndryshme krijon komisione e tilla, ne jemi në krizë … shëndetësia nuk i takon vetëm ministrit të Shëndetësisë, as ministrit Financave, asnjë ministrit, i takon gjithë aparatit qeveritarë. Vetëm nëse të gjithë ne jemi në një dhomë, bisedojmë për të njëjtat gjëra, pajtohemi për të njëjtin strategji, ne mund ta zhvillojmë shëndetësinë e Kosovës. Unë sot jam ministër, nesër mund të mos jem, po ky komision i cilitdo ministri, i cilitdo kryeministri, duhet të vazhdojë të ekzistojë për shkak se e ndihmon shëndetësinë, sikurse kryeministri, Albin Kurti është udhëheqës i disa komisioneve tjera, kështu që absolutisht nuk është zbehje e funksionit tim, mendoj që është fuqizim i funksionit tim”, ka deklaruar Latifi për KP.
Ndër të tjera, Latifi ka thënë se brenda javës së ardhshme ose brenda dy javëve të ardhshme, do të hapet konkursi për 30 specializantë.
“Ne diçka të keqe që kemi bërë shumë vite nuk kemi hapur specializime të reja për askënd, deri para dy vite që kemi hapur 1500 vetë për një kohë. Brenda dy jave do ta hapim konkursin për 30 specializant e pastaj për çdo muaj kemi për të vazhduar të hapin konkurs për specializime të ndryshme”, ka thënë ai.
Sa i përket sigurimeve shëndetësore, Ministri Latifi ka thënë se kjo çështje do të diskutohet në Komisionin Ekzekutiv për shëndetësi.