Kryetari i Sindikatës së Bashkuar të Arsimit, Shkencës dhe Kulturës (SBASHK), Rrahman Jasharaj, ka thënë se Qeveria e Kosovës duhet ta dijë se greva nuk po përmbyllet, por po pezullohet deri në janarin e vitit 2023.
Një gjë e tillë është konfirmuar nga vetë Bashkimi i Sindikatave të Pavarura të Kosovës(BSPK) të shtunën e 1 tetorit. Jasharaj ka thënë se shpreson që Qeveria t’i marrë këto si kohë, për të realizuar një dialog të mirëfilltë, ashtu që greva të mos përsëritet.
“Duke u bazuar në ligjin për grevat i cili autorizon BSPK-në, konstatoj se Këshilli Grevist i BSPK-së ka autorizimin të shpallë pezullimin e grevës së përgjithshme deri në vitin 2023. Uroj që Qeveria të marrë mësim të qartë dhe të mos e marrë si deklarim për fitore sepse nuk ka fituar askush”, ka thënë Jasharaj, gjersa ka deklaruar se vazhdimi i mëtejshëm i grevës dëmton rëndë procesin mësimor.
Nga ana tjetër, kryetari i Bashkimit të Sindikatave të Pavarura të Kosovës (BSPK), Atdhe Hykolli, ka thënë se greva e cila ka vazhduar nga 25 gushti, ka qenë e ligjshme.
“Greva ka qenë e ligjshme dhe e nevojshme dhe greva ishte detyrim sindikal dhe u përdor si mjet i fundit në raport me qeverinë. Greva nuk ishte dhe nuk do të jetë akt personal i askujt as individual e as grup i individëve. Greva është e përcaktuar në Kushtetutë dhe mbrohet edhe me aktet e së drejtës ndërkombëtare, siç është i përcaktuar edhe organizimi sindikal bashkë me të drejtat e tjera, e sidomos me sigurinë e shtetit dhe të gjitha rregullohen me ligje të veçanta”, ka deklaruar Hykolli.
Lidhur me çështjen e pagave, Hykolli ka thënë se ato pritet të dalin të hënën.
Greva në arsim ka qenë prezente nga 25 gushti dhe tashmë gjendet në javën e pestë të saj me ç’rast, ajo po pezullohet deri në janar të vitit 2023. Grevistët kërkonin shumën prej 100 eurosh deri në miratimin e Ligjit të Pagave, duke mos e pranuar ndihmën prej 50 eurosh në kuadër të pakos së përballjes së inflacionit, të cilën e kishte prezantuar Kryeministri Kurti së bashku me Ministrin e Financave, Hekuran Murati.