Ministri i Mjedisit, Liburn Aliu, ka njoftuar se te Dheu i Bardhë, aty ku kalimi kufitar na bashkon me Luginën e Preshevës, po zhvillohet një projekt shumë i rëndësishëm për shqiptarët e kësaj zone.
Sipas tij, vitin e ardhshëm pritet të vazhdojë ndërtimi i autostradës së Gjilanit, një rrugë e cila do të lidhë Bresalcin me Dheun e Bardhë.
“Te Dheu i Bardhë, kalimi kufitar që na lidh me Luginën, e që vitin e ardhshëm po e vazhdojmë ndërtimin e autostradës së Gjilanit, nga Bresalci deri te Dheu i Bardhë”, ka shkruar Aliu.
Ai ka inkurajuar secilin shqiptar nga Lugina të votojë për Listën “Beteja Politike e Shqiptarëve Vazhdon – Shaip Kamberi’’.
Sipas tij, ky akt i thjeshtë i votës do të jetë një kontribut i çmuar në rrugën drejt një të ardhmeje më të ndritur dhe më të drejtë për komunitetin shqiptar në këtë pjesë.
“Bashkë me Arditën, Hysin, Kadriun dhe Ragmiun u takuam me Shaip Kamberin, bartësin e Listës së subjekteve të bashkuara shqiptare ‘Beteja Politike e Shqiptarëve Vazhdon – Shaip Kamberi’, për t’i shprehur mbështetjen tonë dhe për t’i bërë thirrje secilit shqiptar nga Lugina që të votojë këtë listë që paraqet rezistencën kryesore ndaj një regjimi antishqiptar, autoritar dhe jodemokratik, siç është ky aktual në Serbi”, ka përfunduar ai.