Policia e Kosovës ka njoftuar se hetuesit nga Njësiti i Hetimeve të Përgjithshme të rajonit të Prishtinës, të hënën e 19 dhjetorit kanë arritur të gjejnë personin e dyshuar për veprën penale të mashtrimit, i cili është raportuar në shtator të vitit 2022.
“Puna e hetuesve policor ka rezultuar me identifikimin e personit të dyshuar: – A.Z, mashkull 50 vjeç, shtetas i Republikës së Kosovës”, ka njoftuar Policia e Kosovës.
Policia njofton se pas intervistimit, në prezencë të avokatit mbrojtës, me aktvendim mbi ndalimin e personit të dyshuar të nxjerrë nga ana e prokurorit të shtetit, është dërguar në qendrën e mbajtjes për 48 orë.
“Mbështetur në rezultatet e hetimit, policia ka ngritur dyshimin e bazuar se personi në fjalë, duke i prezantuar fakte të rreme rreth një prone, për të cilën kishin bërë marrëveshje për shit-blerje, dyshohet të ketë marrë nga ankuesi në periudha të ndryshme, shuma të parash (vlera e parave gjithsej 132.000 euro)”, njofton tutje PK-ja.
Tutje thuhet se hetuesit po ndërmarrin veprimet e nevojshme hetimore dhe procedurale lidhur me personin i A.Z, i cili dyshohet të jetë i përfshirë edhe në raste të tjera të natyrës së njëjtë.