Policia e Kosovës ka njoftuar se ka arrestuar një person, me inicialet D.G nën dyshimin për grabitjen e armatosur në një institucion mikrofinanciar në rrugën “Nazim Gafurri” dje në Prishtinë.
Sipas njoftimit të Policisë, i dyshuari gjendej në ndalim policor në Prizren.
“Në vazhdimësi të veprimeve hetimore nga zyrtarët e njësitit të hetimeve të përgjithshme të Prishtinës, është arritur të identifikohet i dyshuari D.G. si i dyshuar për grabitje të armatosur”, thuhet në njoftim.
“Në koordinim me hetuesit te NjHP Prizrenit dhe Prokurorin e shtetit, pasi i dyshuari gjendej në ndalim policor në Prizren i njëjti është intervistuar dhe në cilësi të provave materiale nga hetuesit rajonal të Prishtinës, janë sekuestruar dhe siguruar dëshmi materiale si: -para qe dyshohet se janë grabitur, dhe vetura (Fiat – pikup) të cilën dyshohet se e ka shfrytezuar i dyshuari, në rastin që ka ndodhë dje në një institucion mikrofinanciar në rrugën “Nazim Gafurri” në Prishtinë”.
Gjatë të enjtës së 4 majit, Policia e Kosovës ka bërë të ditur se në rrugën “Nazim Gafurri” në Prishtinë, ka ndodhur një grabitje nën kërcënimin të armës në një institucion mikrofinanciar.
Rastin e ka konfirmuar për Portalin Dukagjini, Flora Ahmeti, zëdhënëse e Policisë së Kosovës në rajonin e Prishtinës.
“Sot rreth orës 14:00 është raportuar për një grabitje të ndodhur në një institucion mikrofinanciar në rrugën ‘Nazim Gafurri’ në Prishtinë. Pas marrjes së informacionit, policia ka dalë në vendngjarje dhe bazuar në informacionet e para dyshohet se një personi i dyshuar nën kërcënim të armës ka grabitur një shumë parash. Policia ka iniciuar një hetim lidhur me rastin dhe ka nisur me ndërmarrjen e veprimeve të nevojshme policore, me qëllim zbardhjen e rrethanave të rastit, si dhe identifikimin dhe arrestimin e personit të dyshuar”, thuhet në përgjigjen e Ahmetit.