Deputetja e Lidhjes Demokratike të Kosovës (LDK), Hykmete Bajrami, ka kritikuar Ministrinë e Arsimit, Shkencës, Teknologjisë dhe Inovacionit (MASHTI) për vonesat në ndarjen e mjeteve për blerjen e teksteve shkollore.
Bajrami ka thënë se kanë mbetur vetëm pesë ditë deri në fillimin e vitit të ri shkollor, ndërsa prindërit ende nuk i kanë marrë mjetet për blerjen e librave.
Ajo ka kritikuar edhe deklaratën e ministrit të Arsimit, i cili, sipas saj, u ka kërkuar prindërve të mos i blejnë librat, pasi ministria është duke negociuar çmimet me shtëpitë botuese.
“Vetëm pesë ditë deri më 1 shtator! Prindërit ende nuk i kanë marrë mjetet nga MASHT-i për blerjen e librave. Për më tepër, ministri u ka thënë prindërve: mos i bleni librat, sepse jemi duke negociuar çmimet me shtëpitë botuese”, ka shkruar Bajrami.
Bajrami ka ngritur shqetësimin edhe për prindërit në komunat që nuk kanë librari, duke thënë se ata çdo vit përballen me vështirësi për t’i siguruar të gjitha tekstet shkollore.
“Mos të harrojmë se ka komuna që nuk kanë as librari. E prindërit e dinë shumë mirë çka heqin çdo vit t’i gjejnë të gjitha librat, sepse shtëpitë botuese, si biznese private që janë, i shtypin librat bazuar në kërkesë”, ka deklaruar ajo.
Ajo e ka cilësuar këtë situatë si “amatorizëm”, duke thënë se furnizimi i nxënësve me libra ka qenë një prej gjërave që ka funksionuar mirë në arsim.