Kryediplomati evropian, Josep Borrell, pas takimit të kryeministrit të Kosovës, Albin Kurti dhe presidentit të Serbisë, Aleksandër Vuçiq në Bruksel, ka thënë se nuk pati pajtueshmëri nga ana e kryeministrit Kurti për zbatimin e Marrëveshjes për normalizimin e marrëdhënieve me Serbinë.
Kjo, pasi ai ka propozuar një kompromis se si do të zbatohet marrëveshja për normalizim.
Borrell ka thënë se Kurti insistoi që të formalizohet njohja de-facto nga Serbia, ndërsa sipas tij, presidenti i Serbisë, Aleksandër Vuçiq pranoi propozimin e BE-së.
“U mundova të gjej zgjidhje, fatkeqësisht pas një takimi të gjatë, Kurti nuk ishte i gatshëm të vazhdonte të ecte përpara për marrëveshjen, ai insistoi që të formalizohet njohja de-facto. Presidenti Vuçiq pranoi propozimin e BE-së, ne u munduam shumë. BE-ja dhe komuniteti i gjerë ndërkombëtar, përfshirë partnerët amerikanë, e shohin këtë si rrugë të vetme për të funksionuar zbatimi. Dyja duhet të kenë garanci se veprimet shpërblehen, me masa nga pala tjetër. Sot, jam munduar me Kurtin e Vuçiqin të gjej rrugën përpara, duke u bazuar në propozimin tonë. Për fat të keq, pas takimit të gjatë, Kurti nuk ishte i gatshëm që të ecet përpara, të fillojë një proces kredibil për themelimin e Asociacionit. Ai insistoi të formalizohet njohja de facto si hap i parë”, ka deklaruar Borrell.
Ndërkaq, edhe më herët, Vuçiq tha se bisedimet me Kurtin përfunduan pa sukses, pasi Kurti, sipas tij, “e refuzoi propozimin evropian”.
Dy liderët, Kurti e Vuçiq u takuan të enjten në Bruksel – për herë të parë pas më shumë se katër muajsh – në kuadër të dialogut për normalizimin e marrëdhënieve.