Boksierja nga Kosova, Donjeta Sadiku ka arritur të kualifikohet në finale në turneun ndërkombëtar “Ballkan”, të mbajtur të mërkurën e 21 shtatorit në Sofia të Bullgarisë.
Këtë e ka bërë të ditur Federata e Boksit të Kosovës përmes një postimi në Facebook, ku kanë thënë se Sadiku është treguar e mirë në garën e zhvilluar me zviceranen Ana Milisiq.
“Sot në gjysmëfinale 60kg, Donjeta Sadiku mundi bindshëm boksieren nga Zvicra Milisic Ana dhe u kualifikua në finale ku do të boksoj kundër boksieres nga Anglia Whitwell Shona”.
“Donjeta sot tregoi boks të mir dhe gjatë tre raundave dominoi në ring, në raundin e dytë e solli kundërshtaren në gjendje të palakmueshme ku detyroi gjyqtarin në ring ti numroi nokdaun boksieres Zvicrane”, shkruhej në psotim.
Donjeta Sadiku ka filluar të merret me boks që nga mosha 12 vjeçare në Prishtinë, me trajnere Marjola Sallauka.
Ajo ka garuar për Kosovën në Lojërat Olimpike Verore 2020 në kategorinë e peshave të lehta për femra dhe më parë ka konkurruar për vendin në Lojërat Evropiane 2019.
Ndryshe turneu ndërkombëtar “Ballkan” ka filluar nga data 19 dhe do të zgjasë deri me 23 shtator, në kryeqytetin e Bullgarisë.