Në Forumin e Prespës për Dialog kanë folur Zëvendës Kryeministri i Maqedonisë së Veriut Artan Grubi, Ministri i Jashtëm i Greqisë Nikos Dendias, Ministri i Jashtëm i Kroacisë Gordan Grliq-Radman dhe ambasadori i Francës Alen Le Roa për çështjen e Maqedonisë së Veriut dhe rrugëtimit të saj për t’u bërë pjesë e BE-së, si dhe nuk është harruar të përmendet edhe lufta në Ukrainë.
Zëvendës kryeministri i Maqedonisë së Veriut Artan Grubi, gjatë Forumit të Prespës për Dialog ka folur rreth pajtimeve të vendeve fqinje për të mos bërë dallime etnike, për marrëveshjen e Prespës dhe dorën e pajtimit me Greqinë, e cila i ka hapur dyert e NATO-s.
‘’Kemi arritur storie të suksesit te përcaktimi përfundimtar për pajtim në vend brenda nesh, në rajon me fqinjët, në rajonin e gjerë dhe familjen euro-atlantike. Sapo shtrimë dorën e pajtimit, jetuam vlerën e lirisë, nuk na pengonte më në punë kolegu i përkatësisë tjetër etnike, nuk na pengonte flamuri i njëri – tjetrit. Nënshkruam marrëveshjen e Prespës për të ndryshuar kushtetutën si dhe dora e pajtimit me Greqinë na i hapi dyert e NATO-s. A humbëm diçka? Absolutisht asgjë! Në kontestin më Bullgarinë fqinje po bëjmë gjithçka për të zhbllokuar rrugën’’, ka thënë Grubi.
Ndërsa, për këtë çështje ka folur edhe Ministri i Jashtëm i Greqisë, Nikos Dendias duke thënë se po japin kontributin e tyre për të avokuar të ardhmen e Maqedonisë së Veriut.
‘’Kemi storie suksesi në Ballkan dhe si storie të tillë suksesi prezantoj relacionin me Maqedoninë e Veriut. Para 10 vitesh, kush do të mendonte se një ministër grek do të vinte këtu për të avokuar të ardhmen e Maqedonisë së Veriut’’, ka thënë Dendias.
Ai shtoi se BE-ja duhet të zmadhohet dhe Greqia është duke bërë pjesën e saj për përkrahjen e partnerëve të saj.
‘’BE-ja duhet të zmadhohet dhe shumë shpejt. Greqia po bën pjesën e saj, duke investuar kapitalin e saj si përkrahje për partnerët tanë’’, ka thënë ministri i jashtëm i Greqisë.
Sa i përket çështjes së aspiratave të Maqedonisë së Veriut për t’u bërë pjesë e BE-së ka folur Ministri i Jashtëm i Kroacisë, Gordan Grliq-Radman.
Ai ka thënë se është duke i parë aspiratat e Maqedonisë së Veriut për t’u bërë pjesë e BE-së dhe zgjerimi me Ballkanin Perëndimor mbetet krucial për ta.
‘’Mund të shoh nga porosia aspiratet tuaja për në BE. Duam të shohim Maqedoninë e Veriut që te jetë pjesë e kësaj familjeje. Zgjerimi me Ballkanin Perëndimor mbetet krucial për ne’’, ka thënë Grliq-Radman.
Ndërsa, ministri i jashtëm i Kroacisë ka përmendur edhe luftën në Ukrainë duke thënë se është shumë sfiduese dhe e rrezikshme që te tejkalohet kjo situatë, siç është situata në Ukrainë.
”Mënyra më e mirë që ti tejkalojmë konfliktet është dialogu dhe të gjejmë kompromise”.
Kurse, Ambasadori i Francës Alen Le Roa, ka thënë se ideja e lansuar nga presidenti i Francës, Emmanul Macron, për Komunitetin Evropian ka krijuar paqartësi, dhe se sipas tij pjesëmarrja e Bashkimit Evropian (BE), nuk është alternative, dhe se këtë do ta diskutojnë në samitin Evropian, i cili do të bëhet e ditur këtë vit.
“Ideja e lansuar nga Macroni për Komuniteti Evropian ka krijuar paqartësi. Kjo nuk është alternative për pjesëmarrjen në BE, ose tejkalim i pjesëmarrjes në BE. Do të lejojmë të diskutojmë në samitin Evropian, i cili do të lansohet këtë vit” ka thënë Le Roa, raporton RTV Dukagjini.
Osmani në Forumin e Prespës: Kontributi ynë krijon stabilitet afatgjatë