Zgjim Hyseni anëtar i Partisë Social Demokrate (PSD) i ftuar në emisionin “Debat Plus” në RTV Dukagjini u shpreh se kryeministri i Kosovës Albin Kurti nuk është duke e refuzuar arritjen e një marrëveshjeje për Asociacionin e komunave me shumicë serbe.
“Bindja jeme është që Kurti nuk është duke e refuzuar marrëveshjen, çështja është që ne nuk po marrim sa duhet mësim nga përvoja”, ka thënë Hyseni.
Hyseni ka theksuar se termat e referencës duhet të qartësohen në Kosovë, pasi sipas tij nuk është sqaruar ende çka nënkuptohet kur flitet për Asociacionin e as çka është ai një etnik.
“Na i kemi pas deklaratat e qëndrimet shumë të forta që pa njohje nuk ka me pas as diskutime, pastaj kemi ardhur te qëndrimi që pa zbardhjet e fatit te të pagjeturve nuk ka me pas dialog, pastaj kemi thënë që nuk kanë me ju shty targat e as zgjedhjet, janë shty”.
“Çështja është që ne duhet me u marrë vesh për termat e referencës apo bëhet a nuk po bëhet Asociacioni. Asociacion një etnik po thojnë, çka nënkupton ky, a nënkupton Asociacion të formuar nga bazat etnike apo i pastër etnikisht. Sepse Asociacion një etnik i bjen mos me pas asnjë shqiptar në territoret e atyre komunave, qaj është Asociacion monoetnik”, ka vijuar Hyseni.