Interesimi i ulët i konsumatorëve komercialë për të paraqitur dëshmitë për numrin e punëtorëve dhe qarkullimin vjetor – në kuadër të procesit të hapjes së tregut – shtyu KESCO-n që të zgjasë afatin deri më 7 prill.
Më pak se 1% e rreth 100 mijë konsumatorëve komercialë në kuadër të Shërbimit Universal dorëzuan në KESCO të dhënat e nxjerra në Administratën Tatimore, për dy javë – prej kur u dha njoftimi për liberalizimin e tregut.
“Ky vendim është marrë në bashkëpunim me ZRrE-në dhe ATK-në, pas fluksit të madh dhe kërkesave të shumta nga bizneset për të sjellë dokumentacionin e nevojshëm, i cili është i domosdoshëm për të vazhduar furnizimin me tarifa të rregulluara”. – KESCO
Për të vazhduar me tarifat e rregulluara, certifikatën e biznesit me numrin unik dhe shifrën e konsumatorit të energjisë elektrike, janë të obliguara t’i paraqesin – në mënyrë elektronike ose fizikisht – edhe bizneset e vogla.
“Obligimin për t’i sjellë këto dëshmi e kanë të gjitha bizneset e vogla që kanë më pak se 50 punëtorë dhe kanë më pak se 10 milionë euro qarkullim vjetor”. –KESCO
Sidoqoftë, zgjatja e afatit për gati dy javë e gjysmë nuk nsnkupton përmbushje të kërkesës së bizneseve që insistojnë për shtyrje të hapjes së tregut për një vit, me qëllim të pasjes kohë për sigurimin e kontratave më të favorshme për furnizim.
Nëse Zyra e Rregullatorit nuk vendos ndryshe, bizneset me më shumë se 50 punëtorë ose me më shumë se 10 milionë euro qarkullim vjetor, nga 1 Qershori do të detyrohen të gjejnë furnizues të ri në tregun e hapur ose bursa.