Ministria e Punëve të Jashtme e Kosovës ka shprehur mbështetjen e saj për aksionet ushtarake të ndërmarra nga vendet perëndimore kundër grupit të armatosur Houthi, në përgjigje të sulmeve të tyre në Lindjen e Mesme.
Ministria thekson ndikimin e këtyre sulmeve jo vetëm në sigurinë, por edhe në tregtinë e mallrave dhe ekonominë globale.
“Armiqtë e paqes, stabilitetit, sigurisë, demokracisë, rendit botëror dhe civilizimit janë armiq të të gjithëve. Vetëm së bashku mund të arrijmë që t’i mundim e të krijojmë një botë të qëndrueshme, e cila prioritet ka paqen, bashkëjetesën, tolerancën dhe përparimin në një botë, gjithnjë e më të globalizuar”, thuhet në njoftim.
Në deklaratë, theksohet gjithashtu se Republika e Kosovës, si një vend demokratik, qëndron ngushtë me partnerët e saj strategjikë në luftën për ruajtjen e paqes dhe sigurisë globale.
“Republika e Kosovës si një vend thellësisht demokratik, rreshtohet qartë në krahë të partnerëve të saj strategjikë në përpjekjet e përbashkëta për ruajtjen e paqes dhe sigurisë në botë”.