Në një ngjarje të mbajtur në Bibliotekën Kombëtare me rastin e 7 Marsit, Ditës së Mësuesit, kryeministri i Kosovës, Albin Kurti dhe ministrja e Arsimit, Shkencës, Teknologjisë dhe Inovacionit, Arbërie Nagavci, shprehën respektin e tyre për rolin dhe kontributin e mësuesve në arsim.
Kryeministri Kurti ka theksuar se pedagogjia është një kombinim i artit dhe dijes, dhe mësuesi është një figura që jo vetëm mëson, por gjithashtu, siç ka thënë ai, zgjon imagjinatën dhe mendjen e nxënësve.
Ai ka shprehur bindjen se misioni i mësuesve është një detyrë fisnike dhe ka theksuar se ata kontribuojnë në zhvillimin e nxënësve.
“Pedagogjia është edhe art edhe dije. Mësuesi është ai që zgjon edhe imagjinatën, mësuesi jo vetëm mëson, por zgjon mendjen e asaj që nuk është zgjuar më parë. Mësuesi zgjon nxënësin e vet. Misioni juaj është më fisniku”, ka deklaruar Kurti.
Ndërkaq, ministrja Nagavci i ka falënderuar mësuesit për punën e palodhur dhe i ka inkurajuar ata të vazhdojnë të ndihmojnë fëmijët të ecin drejt dijes.
Ajo ka thënë se Dita e Mësuesit është një rast për të shprehur respektin dhe vlerësimin për punën e tyre dhe se ngjarja e sotme ishte një dëshmi e thellë e vlerësimit të tyre në shoqëri.
“Sot është dita ku secili prej nesh ngrihet në këmbë për të thënë faleminderit. Me mund e djersë i ndihmoni fëmijët tanë të hedhin hapa drejt dijës. Ngjarja e sotme është dëshmi e vlerësimit tonë për punën tuaj”, ka thënë Nagavci.
Kjo ngjarje nisi me një orë e 30 minuta vonës, pasi aktivistët e PSD-së kishin bërë një aksion simbolik brenda Bibliotekës për ministren Nagavci.
Ata kishin vendosur një librezë imituese në emër të ministres Nagavci, me nota të dobëta.
Me ketë rast, Nol Nushi ka thënë se me këtë po tregojnë se kush po e udhëheq arsimin në Kosovë.
Policia e Kosovës tashmë ka arrestuar disa prej anëtarëve të PSD-së, të cilët kishin rezistuar të dalin nga Biblioteka Kombëtare.