Kryeministri i Kosovës, Albin Kurti ka reaguar pas mbledhjes së panelit në Bled të Sllovenisë, ku ka bërë një përmbledhje të vizitës së tij atje.
Ai ka thënë se i gjithë rajoni duhet të bëhet pjesë e BE-së dhe e NATO-s.
“Ditën e hënë e fillova me panelin e Liderëve në të cilin ndër të tjerash thashë se i gjithë rajoni duhet të bëhet pjesë e BE-së dhe NATO-s ashtu që gjenerata e ardhshme të mos përjetojë vështirësitë që kemi përjetuar ne, ndërkohë duhet të ketë njohje reciproke, respektim të të drejtave të pakicave kombëtare dhe të ketë ballafaqim me të kaluarën”, ka shkruar Kurti në Facebook.
Tutje kryeministri Kurti është shprehur se pas një darke të shtruar nga Kryeministri i Sllovenisë, Robert Golob, me pamje nga natyra, duket sikur vjeshta kishte arritur.
“Pas darkës së shtruar nga Kryeministri i Sllovenisë, Robert Golob të dielën e 27 gushtit pranë liqenit të bukur të Bledit, të hënën filluan punimet zyrtare në sallën e festivaleve në Bled. Me mjegullen mbi liqe, qiellin e ngrysur dhe temperaturat e ulëta dukej sikur vjeshta kishte ardhur më herët në Bled por shiu që ra vetëm sa ja shtoi bukurinë qytetit mes bjeshkëve”, ka thënë Kurti.
Kryeministri Albin Kurti ditën e hënë mori pjesë në një panel diskutues në Bled të Sllovenisë, ku edhe u duartrokit për disa deklarata që i tha në drejtim të Kryeministres së Serbisë, Ana Brnabiq.