Kryeministri i Kosovës, Albin Kurti, ka njoftuar se së shpejti do të jetë për miratim në Qeveri Ligji i ri për zgjedhjet e përgjithshme, i cili parasheh që mërgata të ketë lehtësim real të shprehjes së vullnetit të tyre politik.
Në mbledhjen e Qeverisë, Kurti ka thënë se me këtë draft ligj i jepet fund padrejtësisë së gjatë ndaj mërgatës kur vjen puna te votimi dhe me këtë siç tha ai “përmbush edhe një zotim tonin ndaj mërgatës”.
“Javën e kaluar Komisioni Ad-hoc për reformë zgjedhore përmbylli punën e tij duke hartuar draftin e ri të ligjit për zgjedhje të përgjithshme. Këtë draft së shpejti do ta kemi edhe në Qeveri për të dhënë opinionin dhe komentet tona. Sot dua ta shpalos një dimension të veçantë të tij që ka të bëjë me votimin e mërgatës në zgjedhjet në Kosovë”, tha ai.
Kurti ka theksuar se votuesit nga mërgata në të kaluarën në përgjithësi janë përballur me dy sfida.
“Së pari regjistrimi i tyre ka përfshirë procedura të komplikuara e burokraci dhe së dyti afati për flet dërgimin në postë kanë qenë të shkurta krahas kostos së lartë financiare. Sipas draft ligjit në zgjedhjet e ardhshme parlamentare bashkatdhetarët do të evidentohen si votues në mënyrë elektronike. Regjistrimi i tyre do të bëhet online”.
Kreu i Qeverisë tregoi tri opsionet që diaspora do t’i ketë në dispozicion për të votuar në kohën kur mbahen zgjedhjet parlamentare.
“Do të jetë votimi fizikisht një ditë para ditës së zgjedhjeve në njërën nga ambasadat apo konsullatat të Kosovës. E dyta do të jetë dërgimi i fletëvotimeve me postë brenda vendit ku jetojnë në adresën që e cakton ambasada e Republikës së Kosovës. Me këtë ambasadat do të shndërrohen në qendra të grumbullimit të fletëvotimeve. Opsioni i tretë mbetet mënyra e vjetër e votimit duke i dërguar fletëvotimet me postë në adresë të KQZ-së për vendet ku Kosova nuk ka ambasadë apo konsullatë”, shtoi Kurti.