Kryeministri i Kosovës, Albin Kurti, në një intervistë për Al Jazeera, është pyetur rreth asaj nëse i ka dhënë Serbisë garanci për mosarrestim të serbëve apo për të mos i çuar forcat në veri të Kosovës.
Ai është shprehur se nuk i ka dhënë Serbisë asnjë garanci, pasi sipas tij, nuk mund t’u jepet garanci e as premtime, kriminelëve që janë në listë të zezë të Shteteve të Bashkuara të Amerikës dhe të Britanisë së Madhe.
“Sigurisht që jo. E vetmja garanci që japim si qeveri demokratike është barazi për të gjithë qytetarët. Kushtetutshmëri në gjithë komunat, në gjithë territorin. Rritje ekonomike dhe mirëqenie sociale që nuk e përjashton askënd. Premtime dhe garanci demokratike. Unë s’u jap premtime dhe garanci kriminelëve që kanë urdhër arrest apo që janë në listë të zezë të SHBA-së dhe Britanisë së Madhe”, ka thënë Kurti.
Tutje, ai ka theksuar se nuk mund të garantojë diçka që është kundër ligjit dhe Kushtetutës së Kosovës.
“Sigurisht që jo. Unë s’mund të garantoj diçka që është jashtë apo kundër ligjit dhe Kushtetutës së Kosovës”, ka shtuar Kurti.
I pyetur për një marrëveshje mes vendeve, ai ka thënë se nevojitet marrrëveshje me njohje reciproke në qendër.
“Jo, sepse marrëdhënia e Kosovës dhe Serbisë është abnormal. Duhet marrëveshje për normalizim me njohjen reciproke në qendër”, ka theksuar Kurti.