Ministri i Jashtëm i Maqedonisë së Veriut, Bujar Osmani, ka reaguar në lidhje me rastin e vdekjes së 14-vjeçares së zhdukur një javë më parë, duke thënë se kjo ngjarje është “një tragjedi e tmerrshme”.
Osmani, përmes një shkrimi në rrjetin social “Facebook”, ka paralajmëruar se ky krim do të dënohet ashpër.
“Vdekja e parakohshme e Vanjës është një tragjedi e tmerrshme që na ka prekur të gjithëve. Ngushëllimet e mia të sinqerta familjes dhe të afërmve; mendimet tona janë me ju, megjithëse e dimë se asgjë nuk mund ta kompensojë zbrazëtinë tuaj”, ka thënë Osmani.
“Ky krim do të dënohet rëndë, për çka jam i bindur se Prokuroria dhe Policia kanë vënë të gjitha kapacitetet e tyre për të zbardhur me kujdes dhe saktësi rastin deri në detaje”.
Ai tutje ka deklaruar se do të zbulohen të gjitha detajet e këtij rasti.
“Opinioni me të drejtë kërkon transparencë të plotë. Sado tragjike apo e frikshme të jetë, duhet të përballemi me të gjitha motivet dhe detajet e këtij rasti; jo vetëm për t’i hequr spekulimet dhe manipulimet e shumta, por edhe për t’u pjekur si shoqëri, për të edukuar fëmijët tanë, që të mos harrojmë”, ka përfunduar ai.
Ndryshe, Policia dhe Prokuroria maqedonase kanë njoftuar se kanë gjetur trupin e pajetë të Vanja Gjorçevskas, vajzës 14-vjeçare e cila ishte zhdukur një javë më parë në Shkup.
-
Lexoni edhe këtë: Gjendet në Shkup trupi i pajetë i 14-vjeçares së zhdukur një javë më parë, arrestohen tre të dyshuar
Dyshohet se pesë persona, përfshirë babain e vajzës, kanë lidhje me këtë ngjarje.
Një trup tjetër i pajetë është gjetur në Veles dhe autoritetet thonë se dy rastet kanë lidhshmëri, apo janë kryer nga të njëjtit autorë.
Sipas organeve policore dhe Prokurorisë, motivi për kryerjen e vrasjeve besohet të jetë “përfitimi material”.