Emisari i BE-së për dialogun Kosovë – Serbi, Miroslav Lajçak, ka deklaruar se diskutimet e së enjtes në Bruksel me kryenegociatorin e Kosovës, Besnik Bislimi dhe atë të Serbisë, Petar Petkoviq, kanë qenë të frytshme për të bërë përparim në disa çështje.
“Sot kam pritur kryenegociatorët e Kosovës, Besnik Bislimin dhe atë të Serbisë, Petar Petkoviq, për një raund të takimeve të Dialogut në Bruksel. Diskutimet ishin shumë të frytshme për të bërë përparim në një numër të çështjeve në agjendën tonë”, ka shkruar ai në platformën “X”.
Today, I hosted the Chief negotiators of Kosovo @BislimiBesnik and Serbia @PetkovicPetar for a round of Dialogue meetings in Brussels. Our discussions were helpful to make progress on a number of issues on our agenda. pic.twitter.com/4zpkH0wbrM
— Miroslav Lajčák (@MiroslavLajcak) November 16, 2023
Takimet në Bruksel ishin raundi i radhës i diskutimeve në kuadër të dialogut Kosovë – Serbi.
Të dyja palët kanë zhvilluar takime të ndara me Lajçakun, i cili nuk arriti të sillte në të njëjtën tryezë përfaqësuesit e dy vendeve.
Bislimi ka thënë të enjten se pa nënshkrim të marrëveshjeve të arritura deri më tani, nuk mund të ecet përpara drejt zbatimit të tyre, derisa homologu i tij serb, Petar Petkoviq, ka thënë se draft-statuti për formim të Asociacionit të Komunave me shumicë serbe në Kosovë, ka qenë tema kryesore e diskutimit.
Bislimi e ka konfirmuar se në takim me Lajçakun është diskutuar për një plan të sekuencuar të zbatimit të Marrëveshjes për normalizim të marrëdhënieve mes dy vendeve, si dhe për aneksin e zbatimit.
Në një prononcim pas përfundimit të takimit, Bislimi ka thënë se pa u nënshkruar të tri marrëveshjet, nuk do të fillojë puna për formimin e Asociacionit.
Kryenegociatori i Kosovës tutje ka treguar se në takim është diskutuar edhe çështja e të pagjeturve, ku sipas tij, pasi u pranua një ndryshim nga pala kosovare, dokumenti është konsideruar si i adoptuar.