Kryetari i Lidhjes Demokratike të Kosovës (LDK), Lumir Abdixhiku ka thënë se LDK-ja e përkrah vendimin për reciprocitet.
Në një prononcim për media pas takimit me Kryeministrin e Kosovës, Albin Kurti, Abdixhiku ka thënë se Kurtit i kanë kërkuar që ky i fundit të jetë i guximshëm në dialogun me aleatët dhe veçanërisht, me Shtetet e Bashkuara të Amerikës.
“Më lejoni të shfaqi qëndrimin e LDK-së , të cilin i’a tham kryeministrit. Besojmë se dialogimi i copëzuar, pjesë-pjesë i shkon në interes vetëm Serbisë. Sa më shumë që Kosova merret me marrëveshje teknike, atëherë e ushqim satus-quon. I kërkuam kryeministrit të jetë i guximshëm, të shkojë në dialog me aleatët, veçanërisht me SHBA-në dhe të kërkojë marrëveshje finale me njohje reciproke në thelb të saj, me respektim të Kushtetutës dhe respektim të integritetit territorial”, ka thënë Abdixhiku gjersa ka cilësuar ftesën e Kurtit si “të vonuar”.
Ai ka thënë se në takimin me Kurtin, atij i është kërkuar që të raportoj në Kuvendin e Kosovës, aty ku sipas Abdixhikut, një kryeministër duhet të raportoj para dhe pas takimit.
Pjesë e takimit të Kurtit me opozitën ishte edhe kryetari i Aleancës për Ardhmërinë e Kosovës(AAK), Ramush Haradinaj. Ky i fundit ka thënë se AAK-ja nuk do të hezitoj asnjëherë ta ndihmojë Kosovën në një temë në përballje me Serbinë.
Haradinaj ka thënë se SHBA-të kanë ndihmuar mjaftueshëm Kosovën në procesin e dialogut por rrethanat politike dhe gjeostrategjike tashmë kanë ndryshuar.
Sipas tij, Kurti duhet të kërkonte zyrtarisht që procesi i dialogut tashmë të kalojë tek Presidenti i SHBA-së, Joe Biden.
”Dhe tash është koha që edhe Kurti me kërkua zyrtarisht, që platformën e dialogut me kaluar tek presidentit i Amerikës, tek zotëri Biden, sepse në këtë mënyrë do të sigurohej jo vetëm arritja e marrëveshjes, por edhe garanci në implementim”, ka thënë Haradinaj pas takimit.
Ndërkaq, në takim mungoi Kryetari i Partisë Demokratike të Kosovës(PDK), Memli Krasniqi. Ky i fundit nuk e ka pranuar ftesën.
Në mbledhjen e këshillit të përgjithshëm të LVV-së, kryeministri Kurti kishte ftuar liderët e partive opozitare për të diskutuar lidhur me takimin në Bruksel për të cilin, ka thënë se do të punojë me të gjithë. Sipas Kurtit, të pasurit dallime është e natyrshme mirëpo jo në interes të Kosovës.