Presidenti i Këshillit Evropian, Charles Michel, teksa ka folur gjatë Samitit në Procesin e Berlinit që po mbahet në Tiranë, ka thënë se konfliktet në mes të Kosovës dhe Serbisë nuk duhet të bëhen pengesë për integrim të palëve në BE.
“Në BE, zgjerimi është proces që do të mbetet gjithmonë i bazuar në meritë, duhet të nisë, gjërat duhet të lëvizin nëpërmjet bërjes së reformave. Nuk mund të lëmë konfliktet dypalëshe të na mbajnë peng, zgjidhja mund të jetë më e dhimbshme se reforma, por duhet bërë. Mos i lini fantazmat e së shkuarës të ju vjedhin të ardhmen. Tensionet në mes Kosovës dhe Serbisë e kanë sjellë sërish këtë në vend të parë”, ka deklaruar Michel.
Ai ka thënë se palët të jenë gati që deri më 2030 të ndodhë zgjerimi.
“Duhet të jemi gati deri më 2030 që të zgjerohemi, kemi pritur që një kohë të gjatë. Nuk ka asnjë bashkëpunim pa pajtim, nuk ka të ardhme të qëndrueshme pa pajtim. Pajtimi kërkon kurajo politike dhe fokus te e ardhmja”, ka vijuar ai.