Ministri i Mbrojtjes, Armend Mehaj, të mërkurën e 6 korrikut ka pritur në takim ish-Presidenti i Republikës së Kosovës, Fatmir Sejdiu.
Në këtë takim është diskutuar për zhvillimet aktuale në mjedisin e sigurisë dhe mbrojtjes, procesin e integrimit euroatlantik të Kosovës, dhe për çështje tjera në interes të vendit.
Gjithashtu, është diskutuar për proceset reformuese dhe sfidat aktuale në procesin e integrimit evropian, për çka vlerësuan nevojën e forcimit të unitetit politik dhe qytetar të të gjithëve pa dallim.
Ish-Presidenti i Republikës së Kosovës, Fatmir Sejdiu ka qenë pjesëmarrës i Kuvendit themelues të Lidhjes Demokratike të Kosovës (LDK), anëtar i Komisionit Qendror për organizimin e Referendumit për Pavarësinë e Kosovës, mbajtur më 1991.
Ai gjithashtu ishte deputet në Kuvendin e Republikës së Kosovës dhe presidenti i parë i Kosovës pas shpalljes së pavarësisë. Ndërsa, ka dhënë dorëheqje nga posti i presidentit të Kosovës më 27 shtator 2010.