Minstrja e Arsimit, Shkencës, Teknologjisë dhe Inovacionit, Arbërie Nagavci, ka shprehur ngushëllime për ndarjen nga jeta të profesoreshës së muzikës, Seniha Spahiu.
“Na pikëlloi pa masë lajmi se profesoresha e njohur e muzikës, Seniha Spahiu, ka ndërruar jetë”.
“Profesoresha Spahiu ka punuar si mësimdhënëse e muzikës në të gjitha nivelet e arsimit për të mbetur kështu në kujtesën e shumë gjeneratave si një njeri i përkushtuar për punën dhe për dashurinë ndaj profesionit”, ka shkruar Nagavci në llogarinë e saj në Facebook.
Puna e saj shumëvjeçare në edukimin muzikor të gjeneratave do të jetë shembull për të gjithë, ka thënë ministrja.
“Vepra e saj në përgatitjen e pedagogëve të muzikës, tekstet shkollore e universitare, puna kërkimore në këtë fushë, si dhe vlerat e saj njerëzore, do të jenë frymëzuese përgjithmonë për ne dhe gjeneratat që vijnë”, ka vijuar më tej.
Ndërsa, profesoresha universitare, Besa Luzha, ndarjen nga jeta të ish-profesoreshës së saj, përmes një postimi në Facebook ka thënë se, Spahiu ishte një zonjë e pashoqe, intelektuale, model i aspiruar i gruas së arsimuar shqiptare.
“Lajm i hidhur në këtë ditë vjeshte. Profesoresha jonë e dashur na la. Ajo që mbolli në mua e te shumë studentë të tjerë dashurinë për edukimin muzikor, dashurinë e saj të çmueshme”, ka shkruar Luzha.
Ndryshe, Profesoresha e Muzikës, Seniha Spahiu, ka vdekur të shtunën e 1 tetorit në moshën 86-vjeçare.