Në shtator të këtij viti, për një javë, në Kosovë do të qëndrojë organizata “Gift of Life International”, ku mjekët e kësaj organizata do të operojnë falas fëmijët me probleme në zemër, nga data 10 deri më 17 shtator të vitit 2022.
Këtë e ka bërë të ditur Ministria e Shëndetësisë së Kosovës (MSh), e cila ka realizuar një takim në kuadër të përgatitjeve dhe koordinimit të punëve.
Takimi u zhvillua nga ministri i Shëndetësisë, Rifat Latifi, me Albana Krasniqin e cila është drejtoreshë e organizatës Gift of Life dhe aktivistin Mazllum Belegu.
“Ky takim është realizuar në kuadër të përgatitjeve dhe koordinimit të punëve, për ardhjen e ekipit të mjekëve nga data 10 deri më 17 shtator 2022, në Prishtinë, dhe të cilët janë pjesë e organizatës Gift of Life. Ky ekip i mjekëve do të operojnë falas disa fëmijë, të cilët kanë probleme në zemër, dhe që shërimi i tyre tashmë është bërë i mundur në Kosovë”, thuhet në njoftimin e MSh-së.
Operacionet që do të kryhen falas nga ekipet e “Gift of Life” nuk janë të mundshme të bëhen nga mjekët në Kosovë, gjithashtu janë edhe tejet të kushtueshme.
Ndërsa, ky mision i këtij ekipi të mjekëve, do të mbështetet me mjete financiare nga biznesmeni i njohur shqiptaro-amerikani, Harry Bajraktari.
Ministri i Shëndetësisë i Republikës së Kosovës, Dr. Rifat Latifi, ka takuar znj. Albana Krasniqi, drejtoreshë e organizatës Gift of Life Interantional dhe koordinatore për Kosovën, dhe dr. Mazllum Belegu, po ashtu aktivist dhe humanist në këtë organizatë.
“Me këtë rast ministri Latifi, falënderoj të dy humanistët, znj. Krasniqi dhe dr. Belegun për kontributin dhe angazhimin e vazhdueshëm të tyre, në shërimin e fëmijëve”, thuhet në njoftim.
Ndërkaq, humanistja znj, Albana Krasniqi, në këtë takim ka diskutuar edhe për fillimin e këtij programi, sfidat dhe sukseset.
Megjithatë, ajo ka thënë se është shumë e lumtur, që sado pak po i ndihmon fëmijët me probleme në zemër, pasi që trajtimi i tyre është shumë i kushtueshëm.
Po ashtu, ministri Latifi, ka takuar të premten edhe ish-zëvendës kryetarin për shkollim specialistik në SHBA, John Potts, i cili ka ardhur për hartimin e Udhëzimit të ri Administrativ për Shkollim Specialistik në Kosovë.
Latifi e ka falënderuar atë përzemërsisht për gatishmërinë e tij që të ndihmojë MSh-në për reformimin e thellë të programit kombëtar për shkollim specialistik.
Nga ana e tij, Potts u shpreh i lumtur për ftesën dhe theksoi se nuk do të kursejë asgjë në bashkëpunimin i tij me ministrin Latifi dhe akterët tjerë të sektorit shëndetësor në Kosovë, në mënyrë që Udhëzimi i ri Administrativ të shtrojë rrugën për specializime të mirëfillta dhe të domosdoshme për mjekët e rijnë kosovarë.