Sot do ti jepet lamtumira e fundit gjeniut i letrave shqipe, Ismail Kadare. E homazhet për nderim të jetës dhe veprimtarisë artistike të Kadaresë po zhvillohen në Teatrin Kombëtar të Operës, Baletit dhe Ansamblit Popullor në Tiranë.
Në homazhe po marrin pjesë familjare, miq, figura dhe personalitete të larta e dashamirës.
Kortezhi pritet të niset drejt varrezave të Tufinës në orën 12:30, ndërsa në orën 13:00 do të mbahen një minutë heshtje për nder të Kadaresë.
Në ceremoninë lamtumirëse në Tiranë do të marrin pjesë edhe krerët e shtetit të Kosovës, Presidentja Vjosa Osmani, kryeministri Albin Kurti dhe kryekuvendari Glauk Konjufca.
Atje do të shkojnë edhe disa ministra e deputetë.
Shkrimtari me famë botërore vdiq në moshën 88-vjeçare në mëngjesin e së hënës në Qendrën Spitalore Universitare “Nëna Terezë” në Tiranë pas një sulmi në zemër.
Kjo është agjenda e ceremonisë lamtumirëse:
- 09:00 – Homazhet publike në Teatrin Kombëtar të Operas, Baletit dhe Ansamblit
- Popullor
- 11:30 – Ceremonia shtetërore e Lamtumirës
- 12:30 – Nisja e kortezhit në drejtim të varrezave të Tufinës
Ndryshe, gjatë ditës sot, me fillim prej orës 11:00 në ambientet e Akademisë së Shkencave dhe Arteve të Kosovës do të mbahet mbledhje komemorative në respekt të jetës dhe veprës së Kadaresë.