Policia e Kosovës ka njoftuar të mërkurën për një rast të dhunimit që ka ndodhur në Komunën e Mitrovicës dhe një rast të sulmit seksual që ka ndodhur në Komunën e Gjakovës.
Siç bëhet e ditur nga raporti 24-orësh i Policisë, një grua në Mitrovicë ka raportuar se ishte dhunuar nga një person, të hënën e 30 janarit.
“Mitrovicë 30.01.2023-23:00. Me datë 01.02.2023, viktima femër kosovare ka njoftuar se ishte dhunuar nga i dyshuari mashkull kosovar”, thuhet në raportin policor.
Viktima ka pranuar tretman mjekësor, ndërsa i dyshuari është arrestuar dhe pas intervistimit, me vendim të prokurorit është dërguar në mbajtje.
Ndërsa, në Gjakovë është arrestuar një i mitur pasi dyshohet se ka sulmuar seksualisht një vajzë.
“Gjakovë 31.01.2023-20:30. Është arrestuar i dyshuari i mitur, mashkull kosovar, pasi i njëjti dyshohet se ka ngacmuar seksualisht viktimën femër kosovare”, thuhet tutje.
Sipas njoftimit të Policisë, me vendim të prokurorit i dyshuari po mbahet në ndalim policor.